• 13770 Cess...tini in oltra!
  • 13756 SCOUT DEL MOESANO - Si ricomincia ...
  • 13731 Il campanile!
  • 13504 La strada del San Bernardino in mostra all’Ospizio
Ospiti
domenica 1 marzo 2009.
FUMAA

Adèss fumaa una zigarèta, un stumpa o fa una pipada l’è diventada un’impresa. I fumadoo i vegn guardee in cagnèsc ,tratee quasi ala stregua di delinquent. Ala television i fa vedee reclàm tut altro che alegri. Un macelàr che taia su un polmòn e pè i sversa su ‘na tòla de catràm, come chèll chi met giù in strada per fa vedee come el po coiscìass i polmon un che fuma come un camin. Sui pachìtt de zigarètt ghè su scrìcc : “El fum l’at còpa” “El fum el fa maa”.
I marc de zigarètt i po più faa recàm per gar de sport, in ristorant te po più fumaa...Insoma, fumaa l’è diventò quasi un reato. Mi a fumi più. Ho fumò la me part. A pensi ai prim zigarètt fumee de nascondòn con i soci, de solit cui pisee grand de mi , che ghera già una certa esperienza. Om va giù ala stazion. Con vint ghèi del ditributor automatic, una grand novità per nun, es po tiraa fora, oltre a mentìn, cicolatìn, e caramel “mou”, anga un pachètt de Virginia con dent tre zigarètt.
Iè fort, i gà un gust orendo. Però, a fumai de nascondon, magari scundù in ‘ti gabinitt dela stazion um sa sent grand, anga se ,diversi de nun, dopo, i buta su. Ghe di me amis che i gà i pà che fuma, e alora l’è facil, per lo robaa una quai “paia” ,come om eg ciama per sintis important e competent in materia, e famla provaa anga a mi.I marc iè i solit “Parisienne senza filtro” “Super” “Mary Long” “Stella Filtra” “Marocaine”.
Quand eg pasa el Gir dela Svizzera cui dela “Parisienne” i da fora, insema al aleta de carton col lastig per riparàss del soo, anga un pachetìn de “Super” e, i pisee sfacee di nost soci, sempro cui pisee grand, iag riva a fan una bela scorta.Roba che adèss la faria corr la polizia a fa arrestaa i marcant de zigarètt che istiga la gioventù a fumaa. Finida la scola del oblig es po anga fas vedee a fumaa. L’è bell più dovee scondèss per “tiraa una paia”. Una scusa che la val per quasi tucc l’è : “Mi a volevi miga fumaa, ho cominciò a scola recluta.” L’è una bala bela e bona, perchee la magior part de nun, mi compreso, la fumava già prima de met su i beròn militar. Però, a pensag drè, am vegn de rid. Adèss in ‘ti “Consessi pubblici” l’è “Rigorosamente vietato il fumo”.
A vintidu ann a entri a fa part del Consili Comunal. Durant i sedut in sala comunal es fuma, a partii di municipai setee giù al tavolòn. Ala fin di tratand om se dent in’tem mar de nebia, pardon, de fum.
Se te ve al ristorant quand te riva a cà te puza come un presùtt fumicò de cui che la taca su la Mariola su in la so cusina. El bell l’è che ogni ritrovo el gà el so odoo de fum particolar. Te riva a cà e te sent dii: « -Te vegn del Cairo neh ? « Opur :-« Del odoo de fum te se stacc del Nei ».
Per fortuna che, per el begn dela nosta salut, pian pian es comincia a capii che el fum el fa pe miga tanto begn, specialment a cui che i dev respiraa chèl di altri. Mi a pensi però che demonizaa el fum come esageratament el vegn facc adèss, l’è miga giust.Se ghè gent che ga piasee a rilassàs con una zigarèta gustada, senza dag fastidi ai altri, sicurament la fa miga del maa. D’altronde anga sui auti ghè miga su scrìcc “I gas di scarico sono cancerogeni” Né sui aerei “Il kerosene uccide” Né tantomeno sui calder di riscaldament “La nafta ti ruba l’aria”. A scherzi, ma av disi con sincerità : L’è pisee che vint ann che ho piantò lì de fumaa , però am capita de naa in dinsègn de pizaa una bela “Parisienne” tirada fora del pachètt ross, col tabacc voltò insù, già, l’era la zigarèta di operari, iscì, a tirala fora del pachètt i tutigiava miga el filtro coi man bròzz, e gustala, dopo magari una bela mangiada.Certi volt, quand am disedi, am domandi :”Ma ho fumò dabon, o l’era domà in dinsègn ?

Majagatt

top

Ogni uomo può dire quante oche o quante pecore possiede, ma non quanti amici.

Cicerone

 
Sponsors